Kaloi edhe një takim i Këshillit Ministror të BE-së në Bruksel. Edhe kësaj rradhe për Maqedoninë nuk ka datë për bisedime, ndërsa për Islandën siç edhe pritej, u caktua data e fillimit të bisedimeve me BE-në.

Demokracia e Re, ashtu siç mendon edhe shumica e qytetarëve, vlerëson se shteti po ecën në rrugë të gabueshme. Në vend që të na jepej sot data për bisedime me BE-në, ne përsëri jemi jashtë agjendës evropiane.

Fatkeqësisht, edhe miqtë tanë të dëshmuar ndërkombëtarë dita-ditës janë të dëshpëruar nga politika e Qeverisë dhe ngecja  në integrimet euro-atlantike.
Zotërinj qeveritarë, ju bëjmë me dije për të satën herë se pa anëtarësim në NATO dhe BE ky shtet nuk ka stabilitet, nuk ka zhvillim ekonomik dhe nuk ka perspektivë.

Prandaj duhet urgjentisht të zgjidhni kontestin rreth emrit me Greqinë, si kusht kryesor për integrimet euro-atlantike. Nëse ju duhet ndihmë, këtu jemi, sepse ky është interes i gjithë qytetarëve pa dallim kombi dhe feje.

Mjaft më me politikë ditore populiste, merrni njëherë përgjegjësi të burrështetasve serioz. Maqedonia sot, më shumë se asnjëherë më parë në dy dekadat e fundit ka nevojë që ta udhëheqin liderë të vërtetë. Informatat dhe rrethanat tregojnë se Maqedonia tani ka ofertën më të mirë për kompromis me Greqinë dhe tejkalimin e kësaj situate të rëndë dhe të dëmshme për shtetin.

Pa marrë parasysh përkatësinë tonë etnike dhe fetare, ne kemi nevojë për jetë më të mirë dhe më të sigurtë për familjet tona dhe fëmijtë tanë.

Zotërinj qeveritarë, shumë trena po na ikin për në Bruksel. Nuk mundeni gjithnjë të arsyetoheni se dikush tjetër e ka fajin. Ju duhet të jeni të përgjegjshëm dhe të ndërgjegjshëm se çka bëni për të mirën e qytetarëve, e jo gjithnjë të pritni dikush nga jashtë të kryen punët tuaja. Çka është më e keqja, në vend të falenderimit, shpeshherë dini edhe t’i fajësoni të tjerët që kryejnë punët tuaja.
Pranoni këtë sugjerim dhe apel tonin si shumë dashamirës. Ne nuk duam që anija e quajtur Maqedoni të lundrojë drejt ferrit.

Shkup, 27.07.2010                                     

Imer Selmani
Kryetar i Demokracisë së Re